Elkartegintza sustatzeko eta emakumeek euskal autonomia erkidegoko esparru guztietan parte hartzeko, 2012ko ekitaldian emango diren diru-laguntzak

Irabazi-asmorik gabeko elkarte eta federazioek, eta fundazioek, baldin eta helburu eta jarduteko eremu bakarra emakumeen sustapena badute eska ditzakete.

Zenbatekoa, hasieran behintzat, hirurehun eta hogei mila (320.000) eurokoa izango da.

Eskaera bakoitzari 12.000 euro emanez, gehienez ere.

Euskal Autonomia Erkidegoko Administrazio Orokorrak eta horren organo autonomoek emandako izaera bereko laguntzei edo diru-laguntzei dagokienez, itzulketa- edo zehapen-prozeduraren bat hasita badago eta oraindik izapidetzen ari bada, aipatu prozedura amaitzea ezinbestekoa izango da diru-laguntzak ordaindu ahal izateko.

1.- Diru-laguntza zatika ordainduko da: ehuneko hirurogeita hamabost, 13.a) artikuluan aipatutako epea igaro ondoren –uko egin gabe-, eta gainerakoa, ehuneko hogeita bost, diruz lagunduko jardueretan sortutako gastu guztiak justifikatu ondoren; bigarren zatia ordaintzeko, agiri hauek aurkeztu beharko dira 2013ko otsailaren 28ra arteko epean (egun hori barne):

             - Jasotako funts publikoak zertan erabili diren justifikatzeko memoria. Memoria horretan, proiektuan aurreikusitako egutegia kontuan izanda, egindako jarduerak eta lortutako emaitzak deskribatuko dira (IV. eranskina).

             - Diruz lagundutako jardueratik ateratako produktua, halakorik balego.

             - Balantze ekonomikoa, diruz lagundutako jarduera bakoitzeko (IV. eranskineko ereduaren arabera).

             - Diruz lagundutako gastua egin dela justifikatzen duten fakturak edo agiriak edo Emakunde-Emakumearen Euskal Erakundeak konpultsatutako fotokopiak; kasu horretan, Emakundek jatorrizko fakturei zigilua jarriko die, eta, ondoren, erakunde interesdunari itzuliko dizkio; funtsak behar bezala erabili direla egiaztatzeko behar beste xehetasun eman beharko da. Faktura edo dokumentuetan jasotako gastuaren data 2012ko abenduaren 31 izango da gehien jota. Justifikazioa bide elektronikoz izapidetzen bada, jatorrizko dokumentazioa eskaneatuta eta elektronikoki sinatua bidaltzea onartuko da.

             - Soil-soilik lagundutako proiektua garatzen –eta ez beste ezertan- diharduten pertsonen soldata eta lansariak justifikatzeko agiriak.

             - Funtzionamendu-gastu arrunten egiaztagiriak; gastu horiek erakunde eskatzaileak aurkeztutako jardueraren aurrekontu banakatu eta xehatuan agertu behar dira, eta jardueraren garapenari lotuak egon behar dute ezbairik gabe.

             - Diruz lagundutako jardueren publizitatean Emakunde-Emakumearen Euskal Erakundearen lankidetza agertu dela eta elkarteek edo federazioek jarduerak bere gain hartu dituztela egiaztatzen duten egiaztagiriak.

             - Erakunde jasotzaile bakoitzeko, 3000 eurotik gora ematen diren diru-laguntzetan: egiaztagiri eguneratua, zerga-betebeharrak ordainduta daudela egiaztatzeko; dagokion foru ogasunak egin beharko du, artikulu honetan jasotako agiriak aurkeztu aurreko hiru hil lehenago gehien jota, ebazpen honen 7.1.1. artikuluaren azken atalean jasotzen den baimena eman denean salbu.

             2.- Proiektuaren behin betiko kostu osoa gutxitzen bada, diru-laguntza kalkulatzeko kontuan hartu zen kostuari dagokionez, edo gastua egiaztatzeko agirien bidez (fakturak, ordainagiriak, etab.) justifikatzen den zenbatekoa emandako laguntza baino txikiagoa bada, dagokion zati proportzionala kenduko zaio diru-laguntzaren zenbatekoari.